Սյունիքի դեպքի ու Լավրովի այցի միջև կապ կա․ սա սադրանք էր՝ ՀՀ-ից զիջումներ կորզելու համար․ Գագիկ Մելքոնյան
Yerevanlur-ի զրուցակիցն է պաշտպանության նախկին փոխնախարար, գեներալ Գագիկ Մելքոնյանը։
– Պարոն Մելքոնյան, ինչպե՞ս եք գնահատում Սյունիքում տեղի ունեցող զարգացումները։ Թշնամին ներխուժել է ՀՀ տարածք, ի՞նչ պետք է անել այս իրավիճակում։
– Սյունիքի դեպքերը հիմնականում սահմանային վեճեր են, որը պետք է քարտեզներով ճշտել։ Իրենց մոտ կան իրենց քարտեզները, մեզ մոտ կան մեր քարտեզները, որոնք չեն համընկնում միմյանց հետ։ Դրա համար հարկավոր է երրորդ կողմի միջամտությունը։ Սա Արցախի սահմանը չէ, սա Հայաստանի սահմանն է, որը ճանաչված հանրապետություն է աշխարհով մեկ։ Հայաստանը ՀԱՊԿ-ի անդամ է, նաև ՀԱՊԿ-ը՝ հիմնականում Ռուսաստանը պետք է միջամտի, որպեսզի այդ տարածքները ճշտվեն։
Ամենակարևորը, մենք պետք է սառնասրտություն ցուցաբերենք, որ չգնանք առճակատման, այլ խնդիրը լուծենք խաղաղ ճանապարհով։ Այնտեղ կան պետական պաշտոնյաներ, ովքեր սպասում են հարցի լուծմանը։ Ինչքան գիտեմ, արդեն ռուսներն էլ են խառնվել գործին։
– Նիկոլ Փաշինյանն ասաց, որ ակնհայտ կեղծ քարտեզներով են ադրբեջանցիները ներխուժել ՀՀ տարածք։
– Այո, բնական է, որ իրենք հիմա սադրում են։ Իրենց պետք է, որ մեզ մոտ կայուն վիճակ չլինի, իրենց դա ձեռնտու է։ Մեզ մոտ էլ արդեն ներքին խժդժությունները սկսվել են։ Մենք պետք է համախմբվենք, երկիր ենք կորցնելու, բայց հակառակը, մարդիկ կան, որ խժդժություններ են սկսել:
– Այսինքն՝ ներքին ուժերն այս փուլում պետք է համախմբվե՞ն։
– Իհարկե, ժամանակն է եկել համախմբվելու։ Մենք Արցախում պարտություն կրեցինք, բայց դա չի նշանակում, որ այստեղ էլ պետք է իրենց առաջ խոնարհվենք։ Ոչ, մենք պետք է պատրաստ լինենք, եթե պետք լինի, արդեն պետք է պատերազմենք։
– Ռազմական բախումներ կանխատեսո՞ւմ եք, հնարավո՞ր են։
– Չեմ կարծում։
–Նիկոլ Փաշինյանն այսօր հայտարարեց, որ այս իրավիճակին շատ լուրջ պետք է մոտենանք, որովհետև գործ ունենք ճգնաժամի հետ, որը հետագա զարգացման մի քանի սցենարներ կարող է ունենալ։
– Այո, լուրջ պետք է վերաբերվենք։ Մենք իրենց այդ կեղծ քարտեզները չպետք է վերցնենք որպես հիմք։ Իրենք առիթից օգտվելով՝ կամաց-կամաց վաղն էլ կգան, կասեն՝ Գորիսը մերն է եղել, սա մերն է եղել։ Մենք իրավունք չունենք զիջելու ոչ մի բան և պետք է կանգնենք, պատրաստ լինենք ամեն ինչի։
– Նախքան այս դեպքը, Հայաստանի իշխանությունները հայտարարում էին, որ ՀՀ սահմանները համապատասխանեցվում են ՀԱՊԿ անվտանգության գոտուն, որպեսզի երկրի անվտանգությունն ապահովվի։ Այսօր մենք տեսնում ենք, որ Սյունիքի դեպքով ՀԱՊԿ-ը կարծես չի շտապում միջամտել։ Ի՞նչ պետք է անել այս իրավիճակում։
– Հենց ռուսները պիտի միջամտեն, որովհետև ՀԱՊԿ ասելով՝ հասկանում ենք Ռուսաստան։ Սա Հայաստանի պետական սահմանն է, և Ռուսաստանը պարտավոր է միջամտել։ Իսկ ընդհանրապես, մենք պետք է հասկանանք մեկ բան, որ մեր հույսը մեր վրա պետք է դնենք։ Մենք ուրիշի վրա չպետք է հույս դնենք։
– Այս դեպքը ցույց տվե՞ց, որ Հայաստանն անվտանգության հարցերում այլ երկրների հետ էլ պետք է բանակցի։
– Իհարկե, մենք այլ երկրների հետ պետք է բանակցենք։ ԵԱՀԿ Մինսկի խմբի երկրները պետք է միջամտեն այս դեպքով։ Դրանց լկտիությունն արդեն այն աստիճանի է հասել, որ դարձել են անպատժելի։
– Սյունիքում իրավիճակի լարումը հաջորդեց ՌԴ ԱԳ նախարար Լավրովի՝ Երևան ու Բաքու կատարած այցերին։ Կապ տեսնո՞ւմ եք Լավորվի այցի ու այս դեպքի միջև։
– Իհարկե, ես կապ տեսնում եմ, սա սադրանք էր։
– Ի՞նչ զիջումներ են փորձում կորզել Հայաստանից։
– Լավրովը եկավ, մեզ հասկացրեց, քարտերը բացեց մեր դեմ, որ իրենք ամեն ինչ կանեն, որ օգտվեն բոլորը, բացի Հայաստանից։ Ես այդպես եմ մտածում։ Եվ այս միջոցով, իհարկե, ինչ-որ բաներ են փորձում կորզել։ Ամեն անգամ այդպես է եղել, սահմանային վեճերից օգտվել են իրենք։
– Հիմա ո՞րն է ճնշման թիրախը՝ Սյունիքով միջանցք ստանա՞լը։
– Ոչ թե միջանցք, ճանապարհների բացում են ուզում, երկաթգծի և այլն։ Սկզբում թուրքերն ասում էին՝ եթե չեք տալիս, մենք ուժով կվերցնենք։ Հետո ռուսները հասկացան, որ իրենք են երաշխավորը, ուժով ո՞նց կարող են վերցնել։ Հիմա էլ սահմանային բախումներ են սկսել, որ ինչ-որ բան կորզեն։
Այս ամենը գալիս է մեր մեղավորությունից։ Բոլորն իշխանություն են ուզում այսօր, ասում են՝ իշխանություն տվեք, գերիներին կբերենք, էս կանենք, էն կանենք։ Արեք պրծեք, հետո իշխանություն ուզեք, վաղը-մյուս օրնընտրություն է, ժողովուրդը ձեզ ձայն կտա, արեք, թող տեսնեն։