Ոստիկանությունը արցունքաբեր գազ է օգտագործել Մարսելի արգելված կառնավալում

Ֆրանսիայի Մարսել քաղաքում ոստիկանությունը արցունքաբեր գազ է օգտագործել բազմամարդ կառնավալը ցրելու համար: Իշխանությունների կողմից արգելված միջոցառմանը մասնակցել է մոտ 6,5 հազար մարդ, հիմնականում երիտասարդներ, որոնց մեծ մասը դժգոհ է հավաքների սահմանափակումներից և բարերի ու գիշերային ակումբների փակումից՝ հայտնում է france24-ը:

Ոստիկանությունը նշել է, որ երթի մասնակիցները առանց դիմակների են եղել և չեն պահել սոցիալական հեռավորությունը: Իրավապահների խոսքով՝ սա «կատարյալ անպատասխանատվություն է առողջապահության ճգնաժամի պայմաններում»:

Երկու մարդ բերման է ենթարկվել, նրանցից մեկը ինքնաշեն իրեր է նետել ոստիկանության ուղղությամբ: Իշխանությունները տուգանել են նաև առանց պաշտպանիչ դիմակների քաղաքացիներին:

Մարսելում, ի տարբերություն Ֆրանսիայի 16 մյուս դեպարտամենտների, կարանտինային նոր սահմանափակումներ չեն հաստատվել: Այնուամենայնիվ, քաղաքի բնակիչները պետք է հետևեն COVID-19-ի դեմ պայքարի ավելի քիչ խիստ միջոցառումներին, ներառյալ հասարակական վայրերում դիմակների պարտադիր կրումը և միջոցառումների մասնակիցների թվի սահմանափակումները:

https://www.1lurer.am/hy/2021/03/22/%D5%88%D5%BD%D5%BF%D5%AB%D5%AF%D5%A1%D5%B6%D5%B8%D6%82%D5%A9%D5%B5%D5%B8%D6%82%D5%B6%D5%A8-%D5%A1%D6%80%D6%81%D5%B8%D6%82%D5%B6%D6%84%D5%A1%D5%A2%D5%A5%D6%80-%D5%A3%D5%A1%D5%A6-%D5%A7-%D6%85%D5%A3%D5%BF%D5%A1%D5%A3%D5%B8%D6%80%D5%AE%D5%A5%D5%AC-%D5%84%D5%A1%D6%80%D5%BD%D5%A5%D5%AC%D5%AB-%D5%A1%D6%80%D5%A3%D5%A5%D5%AC%D5%BE%D5%A1%D5%AE-%D5%AF%D5%A1%D5%BC%D5%B6%D5%A1%D5%BE%D5%A1%D5%AC%D5%B8%D6%82%D5%B4/438541

Հրապարակման հեղինակը