Ղրիմի հետ չինական ընկերությունների համագործակցությունը չպետք է քաղաքականացվի

«Չինական ընկերությունները կապ են պահպանում Ղրիմի հետ և համագործակցում են շուկայի սկզբունքներին համապատասխան: Առևտրի ոլորտում այս փոխգործակցությունը չի կարող քաղաքականացվել»,- ասել է Չինաստանի ԱԳՆ ներկայացուցիչը:

Այս կերպ Պեկինը պատասխանել է Կիևի քննադատությանը Ղրիմ չինական պատվիրակության այցին՝ հայտնում է ТАСС-ը:

Գերագույն ռադայի պատգամավոր «Ընդդիմության պլատֆորմ հանուն կյանքի» կուսակցության խմբակցությունից Վադիմ Ռաբինովիչն էլ ենթադրում է, որ Պեկինն այս քայլով իր դժգոհությունն է հայտնում Motor Sich ինքնաթիռի շարժիչի գործարանը ազգայնացնելու Կիևի որոշմանը, քանի որ այն, փաստորեն, խլվում է Skyrizon Aircraft Holdings չինական ընկերությունից և նրա գործընկերներից:

Motor Sich-ը ավիացիայի համար շարժիչներ և արդյունաբերական գազատուրբինային սարքեր արտադրող աշխարհի խոշորագույն ձեռնարկություններից մեկն է: Չինացիներն այստեղ ներդրումներ են կատարում 2016 թվականից: Այժմ փաստացի նրանց է պատկանում ընկերության բաժնետոմսերի 75 տոկոսը, սակայն գործարքը պաշտոնապես ձևակերպված չէ, և Կիևն այն արգելափակել է: Ուկրաինայի ազգային անվտանգության և պաշտպանության խորհուրդը կասկածել է, որ չինացիների իրական նպատակը ոչ թե գործարանը զարգացնելն է, այլ դրա տեխնոլոգիաների և հզորության արտահանումն իրենց երկիր:

https://www.1lurer.am/hy/2021/03/15/%D5%89%D5%AB%D5%B6%D5%A1%D5%BD%D5%BF%D5%A1%D5%B6%D5%A8-%D5%88%D6%82%D5%AF%D6%80%D5%A1%D5%AB%D5%B6%D5%A1%D5%B5%D5%AB%D5%B6-%D5%AF%D5%B8%D5%B9-%D5%A7-%D5%A1%D6%80%D5%A5%D5%AC-%D5%B9%D6%84%D5%A1%D5%B2%D5%A1%D6%84%D5%A1%D5%AF%D5%A1%D5%B6%D5%A1%D6%81%D5%B6%D5%A5%D5%AC-%D5%82%D6%80%D5%AB%D5%B4%D5%AB-%D5%B0%D5%A5%D5%BF-%D5%B9%D5%AB%D5%B6%D5%A1%D5%AF%D5%A1%D5%B6-%D5%A8%D5%B6%D5%AF%D5%A5%D6%80%D5%B8%D6%82%D5%A9%D5%B5%D5%B8%D6%82%D5%B6%D5%B6%D5%A5%D6%80%D5%AB-%D5%B0%D5%A1%D5%B4%D5%A1%D5%A3%D5%B8%D6%80%D5%AE%D5%A1%D5%AF%D6%81%D5%B8%D6%82%D5%A9%D5%B5/433646

Հրապարակման հեղինակը